|
阿姨仔
每一個人對自己母親的稱呼攏不同款，有人叫媽媽、有人叫阿母，嘛有人叫阿娘，那在阮的所在，
都叫「阿姨仔」──不知為啥咪？聽起來真有鄉土味，嘛非常有親切感。
阮家四個姊弟，自細漢開始，就按呢阿姨仔、阿姨仔也，一直叫、一直叫，叫三、四十年啦，
在阿姨仔的面頭前，嘛永遠親像囝仔！
雖然，阿姨仔的稱呼甲人不同，但是，阿姨仔的母愛，甲天下間的母親
攏是同款偉大，無比人卡少，嘛無比人卡小。
會記得阮細漢時，阿爸是討海的人，雖然只有養阮四個囝仔，在莊內並
不算多，但是看海的日子，一天抓魚、二天補網、三天曬網，若有一頓
吃，就算一頓飽，生活並無快活！
不過阿姨仔無論吃好吃壞，還是穿好穿壞，攏嘜怨天怨地，一心只想按
怎甲阿爸逗陣來打拚。
彼當時，無法度找著啥咪頭路，阿姨仔只有用伊的雙手，甲厝邊頭尾逗
陣剖蚵，一天賺無幾元銀，雙手攏要刮甲破空兼溜皮，而且，每一天回
來，還得要煮飯洗衫，照顧一家大大小小。
阿姨仔、阿姨仔也，您擱按怎拖磨，嘛嘜嫌甘苦！
阿姨仔，雖然您無讀過書，但是您識理卡好識字，您甲人作夥，甚至教
育阮姊弟，事事項項嘜計較，處處原諒人；往好想、感謝人。
阮嘛攏有照您的教示，想要按怎來做人甲處世。姊仔雖然是一個查某囝
仔，但是嘛負起大子的責任，自細漢學做衫，勤勤儉儉，一針一線，日
做暝也做，嘛是為著打拚一間厝，要乎兩位飼大人住。姊仔達到心願，
才敢走出房，嫁乎別人！
阿姨仔，阮攏希望您吃到百歲年老，好好乎阮來有孝。乎人感嘆的，好
花不常紅，好景不常留。一年來，您身體就不真好勢啦，病情親像海水
波浪，起起落落地變化，阿爸從頭至尾真不甘，恩恩愛愛地作伴，大姊
、三弟時常台北來回趕，大家攏為著阿姨仔您緊好轉。
阿姨仔，您雖然甲阮度過正月晚，但是，元宵前一天，您煞來將阮放。
元宵暝，乎阮感覺特別寒，厝外門口埕的糊仔燈，嘛無人弄！阮今日才
知，想要甲阿姨仔講一下話，得靠點香叢。「子欲養，親不在」乎阮心
碎萬斷。
不過，阿姨仔您嘛真有福報，您敢有看著無？今日厝邊巷尾，親戚朋友
攏有來啦！尤其，慈濟功德會的師兄姊一行百多名，攏由遠路透暝趕來
，場面多麼莊嚴，這攏是大姊、姊夫甲人結的好緣。
是啦，就是有這種因緣，阿姨仔您在往生前，才能看開世間，萬緣放下
，一心念佛，往生意志堅定。
阿姨仔，您好好去吧！厝內白頭毛的外嬤，甲孤單的阿爸，阮會好好甲
伊照顧有孝啦！阿姨仔，您往生西方極樂世界後，就要倒駕慈航，來世
間度更多的人。
阿姨仔也，敬愛的阿姨仔，祈望啊，祈望在菩薩道上會擱相看啦，阿姨
仔，阿姨仔也......
本文作者／孫秉森
於寒露時節前，
母親含笑歸鄉30年祭..
一杯 黃土，三枝清香灰迴繞下.....
禱告
祈求
多希望停止腳步，
回頭再看一眼，
多希望時間倒轉，
再回到原點；
憶起了本文..
不知
雨水.或是淚水
已沾溼了衣襟..
[一樹]特恭錄本文與樂友公享之
[ 本帖最後由 一樹生千朵 於 2011-9-26 09:44 編輯 ]
| 
